الشهداء اولا يا ولاد التيت

امبارح قريت لمقال شاب اسمه محمد ابو الغيط لقيته مخنوق زي من الارجوزات الي بيطلعو في التلفزيون وبرامج التوك شو ومسمين نفسهم نخبه  فرحت وقلت مش انا لوحدي الي كاره النخبه والي جابو النخبه  

بس زعلت وحزنت لما شقت تدوينته الرائعهالي جاب فيها صور الشباب العادي شباب المناطق الشعبيه شباب الناس الغلابه الي ماتو ومحدش اهتم حتي يكرم اهلهم ولا حتي ينشر صورهم وكأن الفقير حتي لما يضحي بنفسه عشان بلده  ومعاه واحد ابن ناس ولا غني ولا من النخبه اي مسمي بقي لما الاتنين بيستشهدو عشا ن هدف واحد  عشان بلدهم  الغني بيتكرم ويتنشر صورته والفقير يا ولاداه ولا حد بيعبرة وبيعبر اهله حتي في الموت بتفرقو يا بلد  يا شعب يا ناس يا هو كرمو الفقير قبل الغني أدو الناس حقوقها يا حكومه المفروض انها حكومه الثورة يا عصام يا شرف ادي الشهداء الفقراء حقوقهم الماليه والادبيه احنا مش بنشحت منكم ولا بنتراجكم احنا بنأمركم ايوة بنأمركم بصفتي مواطنه مصريه وليا حق علي الحكومه والمجلس العسكري المواطن الي المصري الي شارك في الثورة  عشان يغير النظام والمجلس العسكري مسك الحكم سبناه يحكم عشان ينفذ طلبات الثوار ويحقق اهداف الثورة الي لسه مفيش حاجه منها اتحققت 

عايزين حق الشهدا 

عايزين الي قتلو الشهدا يتحاكمو محلكمات عادله وسريعه ( العداله البطيئه ظلم )

عايزين حقهم المادي

عايزين حقهم المعنوي ( في التكريم  ونشر صورهم )

عايزين حق الفقراء 

ايام حرب 73 الي حارب الفلاح والصعيدي والغلبان والي اخد ارض سينا ء الي حرروها بدمائهم هما رجال الاعمال خدوها ببلاش والي حاربو بياخدو معاش 200 جنيه تخيلو  

اه يا بلد عايزة ولد يعدل المايله  الي مش عايزة تتعدل ابدا

قال يعني اتفجأو

قال ايه هاله سرحان رجعت وجايبه فيديو عملنلنا فيه انها فجرت مفجأه وان الحرس الجمهوري كان متورط في موقعه الجمل  قال يعني
عايزة اضحك بس الموقف يخليني اعيط
وقال ايه النخبه عاملين نفسهم متفاجئين ومكنوش عارفين
سؤال بس هما بتوع الجمل والحصان والبلطجيه دول لما وصلو التحرير نزلو بالبراشوت ولا اكيد عدو علي الحرس الجمهوري والجيش كمان؟
بصراحه كده احنا كنا عارفين  وبنستهبل او عارفين ومش عايزين نصدق الجيش دورة كان علي الحياد يعني وقف يتفرج ويشوف مين الي حيكسب موقفه مش وحش ومش حلو كتر خيرة انه مدخلش وضرب علينا نار لكن برده مش جدعنه انه يشوف الشباب بيضرب عليه نار وبيتحدف عليه موتلوف والبلطجيه جايين يموتهم ويقف يتفرج وكأنه قال لمبارك احنا مش ضربين عايز تضرب ابعت ناس انت من عندك ومبارك مكدبش خبر  يله مش عايزين نفتح في جراح قديمه بس ميجوش بقي الناس النخبه ويعملو متفاجئين
ولا يطلع المطبلاتيه بتوع كل عصر وكل زمان ومكان يقولو الجيش حمي الثورة ولولاه مكنتش الثورة نجحت وحبه حبه حيعملوة هوه الي قام بالثورة وبتوع التحرير  دول من الجيش
- كان فين الجيش بقياداته طول 30 سنه ومصر بتتسرق وبتتخرب  كان فين كان واقف يتفرج علي البلد وهيه بتخرب ومفتحش بقه
- لا ويطلع واحد مطبلاتي يقولك الجيش كان حيعمل الثورة لولا الشعب سبقه هههههههههههههههههههههههههه والله احلي نكته سمعتها  سكت 30 سنه ويا دوب كان حيعمل ثورة والناس الوحشه خدتها من علي طرف دبابته  اه بس لو المطبلاتيه دول يشوفو بلوعه مجاري ويترمو يها ويريحونا من وششهم العكرة ولسانهم الي بينقط قطران وزفت
-ابتديت اشعر بالقلق لما سمعت كلام المستشار البسطويسي لما قال المجلس العسكري شكله كده مش حيسيبها قبل 2013 مع اني كنت حاسه اصل دي مش عمايل ناس حتسيب الحكم وكل همها انها تصلح المايله في الفترة الانتقاليه دي لان هما بيعوجو العدله مش بيصلحو المايله
- شكلي كده ححصل مايكل منير هههههههههههههههههههههه
- البلد دلوقتي مقسومه اتنين نص شايف وساكت وعمال يقنع في نفسه ويصبرها اهو كام شهر ويعدو خلينا مستحملين عشان عجله الانتاج ودولاب العمل وحله الكوسه وكل الحاجات الي بنسمعها دي
- والنص التاني شايف ومش ساكت وعمال يئاوح وللاسف في حمله تشويه لشباب الثورة في الاعلام حمله منظمه ومقصوده عشان يسكتو وميفتحوش بقهم
- الغريب بقي والي مستغرباله موقف دكتور عصام شرف كل الي بيعمله بيطلع يكلم  كلام جيل جدا بس للاسف الافعال عكس الكلام ومنخدش منه ومن الحكومه غير الكلام وبس  اشرفلك يا دكتور شرف لو مش قادر تواجه الفساد وتحقق مطالب الثورة وفي ضغوط عليك تستقيل وترجع التحرير مع الثوار
في النهايه بقول حاجه جوايه وعندي يقين منها ان فيه ثورة تانيه قادمه لا محال
ملحوظه هامه
انا مش قصدي اغلط http://www.youtube.com/watch?v=IVvsPB7deqE&feature=player_embeddedفي المجلس العسكري والجيش اوعو تفهموني صح ده حبيبي وابن حبيبي

الحق الحق الحق فرعون جديد فرعون جديد

قال ايه بيقولو المجلس العسكري بيحقق مع ريم ماجد وحسام المحلاوي عشان جابو سيرة الشرطه العسكريه بتقولو مين يا ولاد المجلس العسكري بتقولو ايه يا ولاد المجلس العسكري 
من أمتي ؟ وليه؟ وعشان ايه؟ هما غلطو في البخاري ولا هوه الشرطه العسكريه والمجلس العسكري اله لا بيغلطو ولا بيعملو حاجه غلط  امال احنا عملنا الثورة ليه مش عشان الي يغلط يتحاكم ويتحاسب ومحدش فوق القانون 
هوه المجلس العسكري وصله ان مصر حصل فيها ثورة علي الظلم والاستبداد وعشان الحريه والكرامه ولا محدش قاله
طيب يا مجلس اديني بقولك في ثورة حصلت عشان نعرف نكلم وننتقد اي وضع غلط واي مؤسسه حكوميه تعمل حاجه غلط والشرطه العسكريه أخطأت في حق الثوار الي تم ضربهم واعتقالهم ومن حقنا نزعق ونقول اننا مش عجبنا  ومش حنسكت لحد يهين كرامتنا تاني مهما كان ومفيش حد خط احمر في البلد دي لان مفيش حد معصوم من الخطيء 
ونصيحه من واحده مش من النخبه سيبك من المنافقين الي حواليك سواء اعلاميين ولا صحفيين ولا منافقين وعاملين ينفخو فيك ويقولك ان الشعب معاك وان الشعب عايزك تحكم البلد وان الشعب مش عجبه تصرفات شباب الثورة عشان للاسف دول الي ودو صحابك في داهيه عشان كان بيسمع لنفاقهم وبيصدقه
والنبي انت حبيبي يا مجلس يا عسكري بس الي يحب حد لما يغلط لازم ينبه عشان ميكررش غلطه تاني وانت عمال تغلط كده بقالك مده تطلع واحد من عندك يشخط في قناه اون تي في وتقولهم ازاي تحطو كلمه حاشده وهيه مش حاشده طب وانت ايه اخششك يا عم الحج حاشده ولا مش حاشده انت زعلان ليه
ولا واحد يطلع برده مش عجبه الشعب ويقوله انت شعب غير منضبط بس قلولنا عايزين تظبطونا علي كام واحنا نظبط 
ولا تضربو العيال بتوع السفارة علقه موت وفي الاخر كمان تحبسوهم وتبهدلوهم 
بالذمه مش حقي ازعل منكو ولا احنا ملناش نفس نزعل منكو ده احنا كنا بنحبكو اوي وشيلناكم في دماغنا بعد الثورة  
بس انا شايفه كده لو ملحقتوش نفسكو وبطلتو تسمعو كلام النخبه المنافقين حنزعل من بعض 
ونصيحه مني سيبكو من النخبه وخليكو مع الشعب  الناس الي مش نخبه 

بالصلاة علي النبي نفتتح المدونه ونفتكر ايام الثورة

بسم الله الرحمن الرحيم 
من ساعه الثورة الي قمنا بيها ايوة احنا الي قمنا بيها ايه انت مش مصدق نفسك ياعم ايوة انا وانت وهيه وهوه الي قمنا بالثورة الطالب والموظف والفلاح والعواطلي والست ام العيال والبنت الروشه والبنت الوحشه والواد الي مسقط بنطلونه مش بتريق والله ده طلع واد  بميت راجل بغض النظر عن البنطلون الي ساقط ده سقط نظام بقاله 30 سنه كاتم علي قلوبنا ومروحنا ومانع عننا الميه والهوي وقهرنا وظلمنا قبل يوم 25 يناير كنت بكلم الناس في الشارع عن ان فيه ثورة يوم 25 بصراحه كنت بتصدم كلهم بيقولو مفيش فايده قلتلهم ليه ما تونس عملتها قلولي لا دول شعب قادر بصيت لنفسي وقلت امال ايه موضوع شعب فراعنه وبنينا الاهرامات وعبرنا بارليف هما كانو بيضحكو علينا في كتب التاريخ لما فهمونا ان المصري اعظم انسان وصاحب اقدم حضارة وان جدودنا الفراعنه كانو متقدمين عن الامريكان انهارده امال بنو الاهرام ازاي ده محدش عارف لحد انهارده  المهم خد بعضي وطلعت علي دوله الفيس بوك الي كنت بحس فيها ان فعلا حتقوم ثورة كل مدخل الفيس بوك احس بالامل انزل الشارع احس بخيبه امل لحد ما جه اليوم الموعود ولقينا الناس نزلت فعلا مكنتش مصدقه نفسي وعماله اتنطط وقول لكل الي كانو بيضحكو عليا ويقلولي مفيش فايده شوفتو شوفتو اهو عملناها اهو شباب الفيس بوك عملها وعلي فكرة بقي يوم 25 الي نزلو الالوفات دي الي شفناها كانو شباب الفيس بوك يوم 28 الشعب كله اتشجع ونزل بعد ما شاف الشباب الي نزلت دي حقيقه وكلنا لازم نعرفها المهم جه يوم 28 وحصل الي حصل وناس ماتت وناس ادهست وناس اضربت كنت متغاظه وحفرقع لما شوفت العهر الاعلامي الي كان في القنوات المصريه كلها الخاصه والحكوميه أسفه علي الكلمه بس ده الوصف الدقيق والمناسب للي كانت بتعمله القنوات المصريه الي سابت الناس الي ماتت والمجازر الي حصلت وعماله تشتم في الثوار والثورة مرة تقولك كنتاكي ومرة تقولك اجنده ومرة تقولك 100 يورو لا والاروجوزات الي كانو بيتكلمو علي التليفون هههههههههههههههههه فكرتوني بتامر بتاع غمرة هههههههههههههههههههههه معلش بموت من الضحك لما بفتكرة لا والمنافقين طبعا كان ليهم دور الممثلين والكتاب والصحفيين ولاعبي الكورة والي كلهم بعد الثورة بعد ما كانو بيشتمو الثوار بقو ثورجيه واشتركو في الثورة في ميدان التحرير دول بجد مش لاقيلهم وصف اكتر من الي اختشو ماتو  المهم ان ثورتنا نجحت في اسقاط راس النظام ولكن بدماء الف شهيد و3000مصاب ولكن ثورتنا مستمرة لان جسم النظام لسه موجوده وبتخرب في البلد واحنا ليها بالمرصاد امال انا عامله المدونه ليه مش عشان حنعدلهم علي الواحده ونفضحهم وخصوصا الناس الي عامله نفسها نخبه وهبطت علينا بالبراشوت بعد الثورة  وبدعو كل الناس الي مش نخبه يشاركو معايا ويكتبو علي مدونتي 
ملحوظه هامه 
لازم الشخص الي يكتب في المدونه يكون معاه شهاده من اتنين موظفين وعليها ختم النسر يثبت فيها انه مش من النخبه يعني تعليم مجاني ومدارس حكومه وركب ميكروباص وتونايه وتوكتوك وكمان اتشعليء في اتوبيس النقل العام واكل فول وعيش من ابو سوسه وميه من الي بتجيب فشل كلوي ولما بيمرض يروح مستفي الميري او القصر العيني وعلي راي توفيق عماشه يكون بيعرف تمن بركه البقرة في السوق بكام ؟ ههههههههههههههههههههههههههههههههه